Sining Dapithapon (Sunset at the Park) held in Los Baños featuring cultural performances in celebration of National Arts Month 2026 (February 25, 2026)
Bilang bahagi ng pagdiriwang ng National Arts Month (NAM) 2026 na may temang “Ani ng Sining: Katotohanan at Giting,” muling pinukaw ang malikhaing damdamin ng mga Los Bañense sa Sining Dapithapon (Sunset at the Park) nitong Pebrero 25, 2026 (Miyerkules) sa General Paciano Rizal Park. Ito ay handog ng Pamahalaang Bayan ng Los Baños sa pamumuno ni Hon. Mayor Neil Andrew Nocon, sa pamamagitan ng Los Baños Tourism Office, suporta ni Hon. Councilor Jay Rolusta, at sa pakikipagtulungan ng Arts Research and Training Institute in Southern Tagalog, Inc. (ARTIST, Inc.) sa pangunguna nila Chairperson Rica Palis at Edward Perez, at ng National Commission for Culture and the Arts (NCCA) National Committee on Dramatic Arts. Tampok sa programa ang mga pagtatanghal na nagpakita ng galing at dedikasyon sa sining, kabilang ang mga kabataang dumalo sa mga theater workshops na isinagawa sa ilalim ng National Arts Month.
Pinasiklab ng mga prestihiyosong grupo at natatanging indibidwal mula sa iba’t ibang institusyon ang gabi ng sining, na umalingawngaw sa husay, damdamin, at malikhaing pagpapahayag. Kabilang dito ang PHSA Folkdance at Dulaang Sipat Lawin ng Philippine High School for the Arts (PHSA); CLAP Children’s Theater at Tremollo Rondalla ng Arts Research and Training Institute in Southern Tagalog, Incorporated (ARTIST, Inc.); Teatro ALAB (Arte Linang, Ani ng Bayan) ng Los Baños National High School (LBNHS) Poblacion; Samu’t Sari ng Colegio de San Juan de Letran Calamba; at si Prof. Leandro Ong ng University of the Philippines Los Baños (UPLB). Sa pamamagitan ng musika, sayaw, at dula, muling ipinakita ng Los Baños ang suporta nito sa kabataang artista at ang matibay na hangaring patuloy na buhayin at palaganapin ang mayamang pamana at kultura natin.
#SiningDapithapon
#NationalArtsMonth2026
#SunsetAtThePark
#MunicipalityOfLosBaños
#SerbisyongDiretsoSaTao
#AbanteLosBaños
| via CJSA/ PIO-MGLB
Related:
-
Most Viewed Article
